HATAW! D'yaryo ng Bayan hatawtabloid.com
TINIYAK kahapon ni Department of the Interior and Local Government (DILG) Secretary Benjamin Abalos, Jr., gumagawa sila ng mga hakbang upang tugunan ang low conviction rate sa mga illegal drug cases sa bansa.
“Noong pag-upo ko bilang Secretary, ‘yan agad ang binigyan ko ng pansin. Inuuna ko ‘yan,” ayon kay Abalos, sa panayam sa radyo at telebisyon.
Nauna rito, sa isang pagdinig sa Kamara kamakalawa, sinabi ni Philippine National Police (PNP) deputy chief for operations P/MGen. Benjamin Santos, ang conviction rate sa drug cases ay nasa maliit na 0.88 bahagdan.
Karamihan aniya sa mga kaso ay naibabasura dahil sa teknikalidad kabilang ang paghawak ng ebidensiya.
Sinabi ni Abalos, maraming kaso ang nadi-dismissed dahil sa kakulangan ng mga testigo.
Upang maiwasan ito, nanawagan si Abalos sa mga local government units (LGUs) na magtalaga ng Department of Justice (DOJ) personnel upang magsilbing witness.
Iminungkahi ni Abalos, ang pagkakaroon ng online hearing sa mga kaso, kung saan ang mga pulis ay hindi maaaring magtungo nang personal sa legal proceedings, dahil sa balidong rason.
Nagbabala rin siya na papatawan ng parusa ang mga pulis na mabibigong dumalo sa hearing nang walang balidong kadahilanan.
Idinagdag ni Abalos, dapat masusing bantayan ng mga awtoridad ang mga laboratory at forensic evidence upang matiyak ang conviction ng mga drug suspects. (ALMAR DANGUILAN)
