HATAW! D'yaryo ng Bayan hatawtabloid.com
HINDI nakaligtas sa itak ng kamatayan ang isang lalaking pinagtulungang pagtatagain ng mag-amang kapitbahay dahil sa away sa lupa sa Purok Cadena de Amor, Brgy. San Isidro, bayan ng Pontevedra, lalawigan ng Negros Occidental, nitong Miyerkoles, 24 Agosto.
Kinilala ni P/Lt. Rowell Peniero, deputy chief ng Pontevedra MPS, ang biktima na si Eric Galope, 37 anyos, at mga suspek na sina Rex Salme, 59 anyos, at kanyang anak na si Bobby, 34 anyos –galing sa barangay hall para sa pagdinig kaugnay ng kanilang alitan sa lupa.
Ayon sa mga salaysay, nang dumaan si Salme na nakasakay sa kariton ng kalabaw, ininsulto umano siya ni Galope.
Dahil dito, agad inatake ng matandang suspek ang bitkima gamit ang bolo ngunit nagawang makatakbo.
Samantala, nakorner ang biktima ng nakababatang Salme na nakaupo sa motorsiko sa hindi kalayuan saka siya pinagtataga.
Agad dinala si Galope sa pagamutan kung saan siya idineklarang dead on arrival dahil sa 10 tama ng itak sa iba’t ibang bahagi ng kanyang katawan.
Ayon kay Peniero, nadakip si Bobby habang patuloy na nakalalaya ang kanyang ama.
Narekober ng pulisya sa pinangyarihan ng krimen ang itak na ginamit sa pamamaslang.
