SITG binuo
2 SA 4 BANGKAY SA KOTSE, KILALA NA

BINUO ang isang Special Investigation Task Group (SITG) matapos kilalanin ang dalawa sa apat na biktima ng salvage sa bayan ng Rodriguez (Montalban), sa lalawigan ng Rizal, na natagpuan nitong Lunes ng umaga, 22 Agosto .

Sa ulat ni P/Col. Dominic Baccay, Rizal PPO Provincial Director, kay PRO4-A PNP Regional Director P/BGen. Jose Nartatez, Jr., kinilala ang dalawa sa mga biktimang sina Robert Ryan Amarillo, 40 anyos, tubong Vigan, Ilocos Sur, residente sa lungsod ng Lucena; at Carl Pabalan, 51 anyos, tubong Negros Occidental, residente sa bayan ng Tayabas, pawang sa lalawigan ng Quezon.

Matatandaang natagpuan kamakalawa ng umaga ang duguang katawan ng mga biktima sa loob ng isang kotse sa naturang lugar.

Dahil dito, binuo ng pulisya ang Rizal Special Investigation Task Group (RSITG) sa pangunguna ni P/Col. Baccay at ng hepe ng Rodriquez MPS na si P/Lt. Col. Marcelino Pipo, Jr., upang matukoy ang pagkakakilanlan ng dalawa pang biktimang babae at maaresto ang mga suspek. (EDWIN MORENO)