HATAW! D'yaryo ng Bayan hatawtabloid.com
HINDI na nakalusot ang isang 31-anyos na lalaki sa ikalawang pagtatangka na magbayad ng pekeng pera, sa pagbili ng pagkain, sa Makati City, kamakalawa ng gabi.
Kinilala ni Makati City police chief, P/Col. Harold Depositar ang suspek na si Thom Jerome Pinzon, residente sa Valenzuela City.
Ayon sa ulat, dakong 7:20 pm nitong Sabado, 13 Agosto, nang arestohin ang suspek sa Daily Knead Store na matatapuan sa Power Plant Mall, Poblacion, Makati City nang bumili ng isang truffle cheese croissant na nagkakahalaga ng P400.
Matapos umanong magbayad ng P500 sa kahera na si Hervy Maurene Garcenila, napansin na kakaiba ang kilos nito kaya inireport sa security guard na si Bernardo Lopez at nadiskubreng sa kalapit na Krispy Kreme store, na ang perang ipinambayad sa Daily Knead Store na P500 bill, may serial number RM225807, ay hindi lumusot sa kanila nang tangkaing ipambayad.
Nalaman sa ultra violet light na peke ang pera.
Pinigil sa Poblacion Sub-Station ang suspek para sa ihahaing paglabag sa Article 168 ng Revised Penal Code (Illegal Possession and use of False Treasury or Bank Notes).
Nanawagan ang Makati City Police sa publiko hinggil sa pagpapakalat ng mga pekeng pera sa lungsod. (GINA GARCIA)
