HATAW! D'yaryo ng Bayan hatawtabloid.com
HINDI na nakapalag ang isang lalaking may kasong panggagahasa matapos arestohin ng pulisya sa pinagtataguan sa lungsod ng San Jose del Monte, sa lalawigan ng Bulacan nitong Lunes, 8 Agosto.
Sa ulat mula kay P/Lt. Col. Cresenciano Cordero, hepe ng San Jose del Monte CPS, kinilala ang nadakip na akusadong si Warly Lacson y Nacinopa, 22 anyos, kasalukuyang naninirahan sa Brgy. Bagong Buhay B, sa nabanggit na lungsod.
Dakong 8:50 am kamakalawa nang isilbi ang warrant of arrest laban kay Lacson sa pangunguna ni P/MSgt. Darwin de Castro sa ilalim ng superbisyon ni P/Lt. Cordero, MAPSA katuwang ang 24th Special Action Company, 2SAB PNP-SAF, 2nd PMFC Bulacan PPO, 301st MC RMFB 3, 3rd SOU Maritime Group at PHPT Bulacan.
Napag-alamang nakatala si Lacson bilang Top 3 Most Wanted Person sa city level ng San Jose del Monte sa dalawang kaso ng Qualified Rape.
Inilabas ang warrant of arrest laban sa kanya ni Presiding Judge Ma. Cristina Geronimo Juanson ng San Jose del Monte RTC Branch 5-FC, may petsang 22 Hulyo 2022 at walang itinakdang piyansa sa bawat kaso.
Kasalukuyang nakapiit ang suspek sa San Jose del Monte CPS Custodial Facility para sa naaangkop na disposisyon. (MICKA BAUTISTA)
