Nagulungan ng Montero
PASLIT DUROG ANG ULO

PATAY ang isang 3-anyos batang babae makaraang masagi ng isang sports utility vehicle (SUV) habang nakatayo sa gilid ng kalsada sa Caloocan City, kamakalawa ng hapon.

Dead on arrival sa Caloocan City Medical Center (CCMC) ang biktimang kinilalang si  Raine Gabisan, residente sa Bisig ng Nayon St., Brgy. 4, ng nasabing lungsod sanhi ng grabeng malalim na tama sa ulo na halos ikinadurog nito.

               Agad sumuko ang suspek at driver na isang Mitsubishi Montero (NDF-6241) na kinilalang si  Josephine Garner, 29 anyos, isang call center agent at residente sa Block 6 Lot 6, Tanguile, Brgy. San Vicente, Angono, Rizal.

Batay sa ulat na nakarating sa opisina ng Caloocan Deputy Chief of Police P/Lt. Col. Ilustre Mendoza, dakong 3:00 pm nang maganap ang insidente sa tapat ng isang basketball court na matatagpuan sa kanto ng Bisig ng Nayon St., ng nasabing barangay.

Nasa gilid umano ng kalsada ang batang babae nang biglang masagi ng Montero na minamaneho ni Garner dahilan upang maipit ang ulo ng batang babae.

Dahil dito nadurog ang ulo ni Raine nang masagi ng kaliwang unahang gulong ng sasakyan na ikinamatay nito.

Ayon sa ulat ng pulisya, ang ama ng biktima, kinilalang si Resller Gabisan, 28 anyos, public utility vehicle (PUV) driver, ang tatayong complainant sa nasabing insidente para sampahan ng kasong Reckless Imprudence Resulting in Homicide ang suspek na si Garner sa Caloocan City Prosecutor’s Office. (ROMMEL SALES)