Sa Bataan
DRUG DEN SINALAKAY 5 TULAK TIMBOG 

ARESTADO ang limang indibidwal na naabutan ng mga awtoridad sa loob ng isang barong-barong na pinaniniwalaang ginawang batakan ng droga sa Brgy. Balsik, sa bayan ng Hermosa, lalawigan ng Bataan, nitong Biyernes, 15 Hulyo.

Sa ulat mula sa PDEA Bataan office, kinilala ang mga nadakip na suspek na sina Isaias Ronquillo, 46 anyos, residente sa Brgy. Balsic; Ma. Cristina Valencia, 20 anyos, at Kim Claret Valencia, 20 anyos, kapwa residente sa Brgy. Bacong; Jectofer Samson ng Brgy. Mabuco, pawang sa Hermosa, Bataan; at Roy Miguel, 44 anyos, residente sa Brgy. Calangain, Lubao, Pampanga.

Nakompiska sa isinagawang operasyon ang apat na selyadong plastic na naglalaman ng hinihinalang shabu, may timbang na halos 11 gramo at tinatayang nagkakahalaga ng P74,800; assorted drug paraphernalia; at buy bust money.

Ikinasa ang operasyon ng pinagsanib na puwersa ng PDEA Bataan Provincial Office, Bataan PPO-PPDEU, SOU3 DEG, at Hermosa MPS.

Nakatakdang sampahan ang mga suspek ng mga kasong paglabag sa RA 9165 o Comprehensive Dangerous Act of 2002. (MICKA BAUTISTA)