Nahulog at nalunod sa ilog
SANGGOL PATAY SA NAVOTAS

ISANG 12-buwang gulang na sanggol ang namatay nang mahulog at malunod sa ilog habang naglalaro sa plangganang may tubig sa loob ng kanilang bahay sa Navotas City, kahapon ng umaga.

Sa nakarating na ulat sa opisina ni Navotas City police chief P/Col Dexter Ollaging, naganap ang insidente dakong 11:20 am sa loob ng bahay ng biktima sa Tagumpay St., Brgy. Tanza 1 Kaliwa ngunit naiulat sa pulisya dakong 6:00 pm.

Sa isinagawang imbestigasyon ni P/Cpl. Billy Godfrey Aparicio, habang naliligo at naglalaro sa plangganang may tubig ang biktimang si Elisha Isabelle Millar at ang nakatatanda niyang kapatid na babae nang mahulog sa ilog ang baby.

Nang pumasok sa loob ng kanilang bahay ang ina ng biktima na si Rachel Zamora, 25 anyos, naglalaba sa labas, para kumuha ng ilang labada, napansin niyang nawawala ang kanyang bunsong anak kaya’t humingi siya ng tulong sa kanilang mga kapitbahay.

Matapos ang masusing paghahanap, natagpuan ang baby sa ilalim ng tubig at sa kagustuhang mailigtas ang anak ay mabilis siyang isinugod ng kanyang ina sa Malabon City Hospital ngunit idineklarang dead on arrival ng attending physician. (ROMMEL SALES)