LOL at It’s SHOWTIME sanib-puwersa sa pagpapasaya 

SHOWBIZ KONEK
ni Maricris Valdez Nicasio

SIMULA Hulyo 16, Sabado, araw-araw na mabubusog sa saya at madadagdagan ng sigla ang buhay ng mga Filipino tuwing tanghali dahil sa back-to-back na pagpapalabas ng Lunch Out Loud at It’s SHOWTIME sa A2Z, Kapamilya Channel, at TV5.   

Simula 11:00 a.m.-12:45 p.m. magbibigay saya na ang LOL na susundan ng It’s SHOWTIME pagsapit ng 12:45 p.m.-3:00 p.m.. Mae-enjoy ng tropang LOL sa Lunch Out Loud ang iba’t ibang mga laro tulad ng kakaibang dating game para sa mga dating magkasintahan na “H.O.P.E,” ang showbiz quiz na “Maritest,” ang pagalingan ng hosts sa pagsagot sa “Beat The 2,”  limpak-limpak na papremyo sa “Pera Usog,” at pagtupad ng mga hiling sa “Sagot Mo, Sagot Ko.”

Patuloy namang maghahatid ng saya at magiging tulay ng pag-asa sa Madlang Pipol ang It’s SHOWTIME. Sa loob ng 13 taon, sinubaybayan at ipinagmalaki ng mga manonood ang husay at talento ng mga Filipino sa Tawag ng Tanghalan. Nagbibigay din ito ng inspirasyon at kasiyahan sa pamamagitan ng mga kuwento ng contestants sa iba’t ibang segments tulad ng “Sexy Babe,” “ReINA ng Tahanan,” “Miss Q and A,” “MiniMe,” atbp.  Ang masayang samahan at kulitan ng It’s SHOWTIME hosts ay patuloy ding mararamdaman sa kanilang tuloy-tuloy na paglilingkod sa lahat ng ating Kapamilya, Ka-A2Z, at Kapatid.       

Dahil sa kolaborasyon ng ABS-CBN Entertainment, Brightlight Productions, Zoe Broadcasting Network, at TV5, mas maraming Filipino pa sa bansa ang maaabot ng mga dekalidad na programa na magpapangiti sa mga manonood tuwing tanghali.