Tatlong bilang ng pangmomolestiya
WANTED NA MISTER NALAMBAT

BAKAL na kulungan ang hinihimas ng isang mister na wanted sa tatlong bilang ng kasong pangmomolestiya matapos malambat sa isinagawang manhunt operation ng pulisya ng Navotas City, kamakalawa ng hapon.

Kinilala ni Navotas City police chief Col. Dexter Ollaging ang naarestong akusado na si Lucio O, Jr, 47 anyos, residente sa E. Tuazon St., Brgy. San Jose, Navotas City.

Ani Ollaging, nakatanggap ang mga tauhan ng Warrant and Subpoena Section (WSS) ng Navotas police ng impormasyon mula sa isang impormante na naispatan ang akusado sa kanilang lugar kaya agad silang bumuo ng team.

Kasama ang mga tauhan ng Sub-Station 3, kaagad nagsagawa ng joint manhunt operation ang WSS na nagresulta sa pagkakaresto sa akusado dakong 2:25 ng hapon sa E. Tuazon Street.

Ang akusado ay inaresto sa bisa ng warrant of arrest na inisyu ni Judge Cecilia B. Parallag ng Regional Trial Court (RTC) Branch 9 Family Court ng Navotas City sa kasong Acts of Lasciviousness in Relation to Sec. 5 (B) of RA 7610 (3 counts). (ROMMEL SALES)