May bitbit na sumpak
KELOT KULONG SA KANKALOO

SHOOT sa loob ng rehas na bakal ang isang lalaki matapos mahulihan ng isang improvised shotgun (sumpak) sa Caloocan City, kamakalawa ng gabi.

Kinilala ang suspek na si Philip Cruz, 42 anyos, residente sa Lapu-Lapu Avenue, Brgy.12 ng nasabing lungsod na nahaharap sa kasong paglabag sa RA 10591 (Illegal possession of firearms and ammunition).

Ayon sa ulat, nakatanggap ang mga tauhan ng District Special Operation Unit (DSOU) ng Northern Police District (NPD) tungkol sa isang lalaki na may bitbit umanong baril sa Lapu-Lapu Avenue ng nasabing barangay.

Dakong 11:20 pm, kaagad nagresponde sa naturang lugar ang mga tauhan ng DSOU sa pangunguna ni P/Maj. Rengie Deimos at nakita nila ang suspek na may bitbit na baril habang naglalakad sa nasabing lugar.

Nang sitahin, hindi naman pumalag ang suspek na agad sinunggaban ng mga pulis at narekober sa kanya ang isang improvised shotgun (sumpak) may isang bala ng 12 gauge. (ROMMEL SALES)