Ryza hanga sa bilis at galing ng pagdidirehe ni Laranas

SHOWBIZ KONEK
ni Maricris Valdez Nicasio

HINDI napigilang isambulat ni Ryza Cenon ang kanyang paghanga sa direktor ng kanilang pelikulang Rooftop na si Yam Laranas nang magkaroon ito ng mediacom kamakailan.

Ani Ryza,  “Actually, he’s amazing, kasi hindi lang siya ang director ng movie, he is also the screenwriter and the director of photography. So nakabibilib siya na kaya niya lahat gawin ‘yun. 

“Kung titingnan mo, nakakapagod, pero obvious na siya, nag-e-enjoy lang sa ginagawa niya.”

Ang Rooftop ang comeback project ni Ryza at natuwa siyang nakasama siya rito sa pelikulang ito with Marco Gumabao, Rhen Escano, Marco Gallo, Ella Cruz, Andrew Muhlach, at Epy Quizon.

“First time kong makatrabaho si Direk Yam. Ang bibilis nilang magtrabaho. ‘Yung production staff mabibilis silang lahat kumilos, so ‘yun naman ang nagustuhan ko,” sambit pa ni Ryza.  

At dahil horror-thriller movie ang Rooftop napag-usapan ang ukol sa pagkakaroon ng third eye ni Ryza. Naikuwento ng first time mom na ramdam na ramdam niya ang ilang ligaw na espiritu sa abandonadong Quezon Institute na pinag-syutingan nila. Bukas na bukas pala kasi ang kanyang third eye.

Naikuwento pa ni Ryza na bata pa lang siya’y may third eye na siya. Kaya naman sa tinirhan nilang townhouse noon ay nakakaramdam at nakakakita siya ng mga ligaw na kaluluwa.

“When I feel something creepy on the set, doon na lang ako humuhugot para mairehistro ko on cam na mukha talaga akong takot na takot.

“Kasi sa scenes na tinatakot kami ng multo, wala naman talaga siya, but we have to pretend na nandoon siya and we are so frightened,” aniya pa.

Palabas na sa Vivamax ang Rooftop at kung mahilig kayo sa katatakutan, tamang-tama ang pelikulang ito sa inyo.