Di kilalang babae tumalon sa condo, bumagsak sa 6/F patay

HINIHINALANG nagpatiwakal ang hindi kilalang babae sa pamamagitan ng pagtalon sa gusali at bumagsak sa ika-anim na palapag ng isang condominium sa Quezon City, nitong Martes ng umaga.

Sa report ng Criminal Investigation and Detection Unit ng Quezon City Police District (CIDU-QCPD), bandang  7:00 am, kahapon 14 Hunyo, nang madiskubre ang nakabulagta at duguang katawan ng hindi kilalang biktima sa 6th floor sa likuran ng  isang condominium sa Brgy. Sto. Cristo, Quezon City.

Batay sa imbestigasyon ni P/SSgt. Alvin Bolastig, nagroronda ang security guard na si Theresa De Castro sa buong bisinidad ng condo nang matagpuan ang nakabulagtang biktima at wala nang buhay.

Agad ipinagbigay alam ng guwardiya ang insidente  sa kanyang superior at ini-report sa mga awtoridad ang hinalang pagpapatiwakal ng biktima.

Nagsasagawa ng masusing imbestigasyon ang mga awtoridad sa insidente at inaalam ang pagkakakilanlan ng biktima kung ito ay residente ng condo sa nasabing lugar. (ALMAR DANGUILAN)