HATAW! D'yaryo ng Bayan hatawtabloid.com
PABONGGAHAN
ni Glen P. Sibonga
MALAKING karangalan para sa tinaguriang Millennial Pop Prince na si Yohan Castro na makadaupang-palad at mabigyan pa ng kanta ng tanyag at multi-awarded composer na si Vehnee Saturno.
Kaya naman nakaramdam si Yohan ang malaking hamon na mapandigan at mabigyan ng hustisya ang komposisyong ipinagkatiwala sa kanya ni Vehnee.
“It’s a very big challenge for me dahil ‘yun nga pangalan ni Vehnee Saturno ‘yung nakasalalay doon. So, ako bilang Yohan Castro, ano ang magagawa ko roon sa song na ibinigay niya? It’s a challenge for me, na alam ko gusto rin ni Sir Vehnee na mabigyan ko ng justice ‘yung song.
“Napakalaking oportunidad na makasama ko siya. Sabi ko, ‘Nananaginip ba ako?’ Kasi ang laki ng pangalang Vehnee Saturno para maikabit sa pangalan ko once na makapag-record na ako ng isa man sa mga kanta niya. Bihira lang ‘yung nabibiyayaan ng isang awit mula sa napakagaling na kompositor ng bansa. It’s a big, big achievement na sa buhay ko!” sabi ni Yohan sa press launch at artists contract signing ng ARTalent Management na humahawak sa kanyang career sa pangunguna ni Arthur Cruzada.
Pero mas lumaki pa ang kasiyahan ni Yohan nang malaman niyang hindi lang isa kundi dalawang original songs ang ibibigay sa kanya ni Vehnee.
Samantala, isinabay din sa press launch ng ARTalent Management ang pagpirma ni Yohan ng kontrata bilang endorser at ambassador ng Marah Dalciano Hotel and Resort, Wash N Fresh, at Le Premier Language International. Dagdag ito sa mga nauna nang ineendoso ni Yohan na Queen Eva Salon & SPA at Luminescence Face and Body Care.
Nagpapasalamat nga si Yohan sa pagtitiwalang ibinigay sa kanya ng mga ito para maging ambassador gayundin ang malaking suporta ng mga ito sa kanyang singing career.
