HATAW! D'yaryo ng Bayan hatawtabloid.com
BAGSAK sa kulungan ang magsyotang kapwa ‘tulak,’ kasama ang isa pang hinihinalang drug personality, matapos makuhaan ng tintayang P17o,000 halaga ng shabu sa magkakahiwalay na buy-bust operations sa Valenzuela City.
Batay sa ulat ni P/Cpl. Pamela Joy Catalla, dakong 5:00 am nang magsagawa ang mga operatiba ng Station Drug Enforcement Unit (SDEU) sa pangunguna ni P/Lt. Joel Madregalejo ng buy bust operation sa San Vicente St., Brgy. Karuhatan, na nagresulta sa pagkakaaresto kina Jeric Alolod, 24 anyos, at Bernadette Elejorde, 30 anyos, kapwa residente sa Tangele St., Bancal Ext., Meycauayan, Bulacan.
Nakuha sa mga suspek ang nasa limang gramo ng hinihinalang shabu, may standard drug price na P34,000, P300 marked money, P100 cash at cellphone.
Dakong 2:30 am naman nang respondehan ng kabilang team ng SDEU sa pangunguna ni P/Lt. Doddie Aguirre ang natanggap na tawag mula sa concerned citizen hinggil sa nagaganap na illegal drug activities sa Pacheco Bypass Road, Brgy. Lawang Bato na nagresulta sa pagkakaaresto kay Perlito Cuizon, Jr., 41 anyos, at Richelle Puno, 35 anyos, therapist, matapos maaktohang nag-aabutan ng shabu.
Ayon sa ulat ni P/SSgt. Ana Liza Antonio, nakompiska sa mga suspek, ang nasa 10 gramo ng hinihinalang shabu, may halagang P68,000, cellphone, P600 cash, at motorsiklo.
Nauna rito, dakong 11:20 pm, nakuhaan din ng aabot sa 10 gramo ng hinihinalang shabu, nasa P68,000 ang halaga at P30O cash ng isa pang team ng SDEU sa isinagawang validation sa Agapita St., Brgy. Gen. T. De Leon si Christopher Borbe, alyas Tetet, 35 anyos, residente sa nasabing lugar.
Kapwa nahaharap ang mga suspek sa kasong paglabag sa RA 9165 o ang Comprehensive Dangerous Drug Act of 2002. (ROMMEL SALES)
