Aaron nabigla nang tsugihin sa Ang Probinsyano

SHOWBIZ KONEK
ni Maricris Valdez Nicasio

IKINAGULAT pala ni Arron Villaflor ang biglang pagkawala niya sa action-seryeng pinagbibidahan ni Coco Martin, ang Ang Probinsyano.

Nabanggit at napag-usapan ito sa isinagawang story conference ng original series ng Viva, ang Wag Mong Agawin ang Akin kamakailan.

Kuwento ni Aaron ukol sa pagkasibak sa longest-running series ng Kapamilya Network, “Hindi ko nga alam kung bakit ako nawala sa ‘Ang Probinsyano.’ That was my last series sa ABS-CBN so I waited for two years.”

Sinabi pa ni Aaron na ang Ang Probinsyano ang naging huling serye niya sa Kapamilya at simula noon ay hindi na siya muling nabigyan ng chance para makapag-work muli.

“Dalawang taon na rin po akong hindi nakakabalik sa series kaya I’m glad and thankful, may panibagong blessing,” anang aktor.

“Nagpapasalamat ako sa family ng Vivamax for acknowledging me and, somehow, putting me on their project.

“I’m excited but a little bit nervous. Gagawin natin kung ano ‘yung hinihingi ng project,” sambit pa ni Arron.

Nasabi naman ni Josef Elizalde, kasama rin sa Wag Mong Agawin ang Akin, na tatlong taon din silang napanood ni Aaron sa Ang Probinsyano.

At dahil sasabak na si Aaron sa Vivamax na kilala sa paggawa ng maraming sexy films, natanong ang aktor kung magiging palaban na rin ba siya sa pagpapaseksi at paghuhubad sa bagong original series ng Vivamax.

“Wait for it na lang po. Can I say na I will surprise you?” anito na bukod sa kanila ni Josef ay makakasama rin sina Angeli Khang, Jamila Obispo, Felix Roco, Yayo Aguila, at Angelica Servante, sa direksiyon ni Mac Alejandre.