Umawat sa pagwawala tinaga
KAGAWAD SUGATAN, SA UTOL NA INUTAS NG REVOLVER

SUGATAN ang isang barangay kagawad matapos tagain ng nakababatang kapatid na kalaunan ay kaniyang nabaril at napatay dahil ayaw magpaawat sa pagwawala sa Brgy. Basak, bayan ng Cauayan, lalawigan ng Negros Occidental, nitong Linggo, 22 Mayo.

Kinilala ang kagawad na si Freddie Baballero, 51 anyos, tinaga ng kaniyang nakababatang kapatid na si Richard.

Ayon kay P/Lt. Col. Roberto Indiape, Jr., hepe ng Cauayan MPS, inaawat umano ng opisyal ng barangay ang kanyang kapatid na nagwawala dahil sa kalasingan.

Sinabi ni Indiape, armado ng itak si Richard at patungo sa ibang barangay kaya pinigilan ng kanyang kuyang si Freddie.

Sinabing ikanainis ito ni Richard at sinalakay ang sariling kapatid saka tinaga sa kaliwang braso.

Dahil dito, kinuha ng kagawad ang kaniyang kalibre .38 revolver saka dalawang beses pinaputukan ang kapatid sa kanyang katawan.

Kapwa dinala ang magkapatid sa pagamutan ngunit idineklarang dead on arrival si Richard.

Samantala, kusang loob na sumuko ang barangay kagawad sa pulisya dala ang kaniyang baril.

Dagdag ni Indiape, pinag-uusapan ng pamilya kung magsasampa sila ng kaso laban kay Kagawad Freddie.