HATAW! D'yaryo ng Bayan hatawtabloid.com
NAGTUNGO si PNP officer-in-charge (OIC) P/Lt. Gen. Vicente Danao, Jr., sa matagumpay na buy bust operation ng PNP Drug Enforcement Group (PDEG) kung saan nasabat ang tinatayang 12 kilo ng shabu na nagkakahalaga ng P81 milyon sa tatlong high value drug suspects lulan ng isang Honda Civic Sedan.
Nasakote sa tapat ng isang convenience store sa kanto ng Maysan Road at C.J. Santos St., Valenzuela City ang mga suspek.
Nabatid kay PNP OIC P/Lt. Gen. Danao, ang kampanya kontra kriminalidad at droga ay patuloy na inilulunsad at mas paiigtingin pa ng pulisya sa panahon ng kanyang pamumuno sa pambansang pulisya.
Ito ay upang matiyak ang katiwasayan ng mga komunidad at kinabukasan ng ating mga kababayan partikular ang mga kabataan.
Kasabay nito, muling nagbabala si Danao sa mga ‘would be criminals’ at mga sindikato ng droga na itigil ang ilegal na aktibidad dahil hindi nagpapahinga ang PNP sa pagtugis laban sa masasamang elemento.
“Lahat ng gumagawa ng ilegal na aktibidad lalo sa droga, masuwerte kayo kung maabutan kayong buhay tulad nito hindi lumaban. Pero ‘pag nagtagpo tayo, definitely may kalalagyan kayo. Kung ayaw ninyong baguhin ang mga buhay ninyo, babaguhin ko ang birthday ninyo!” pagtatapos na pahayag ni Danao.
(BRIAN BILASANO)
