HATAW! D'yaryo ng Bayan hatawtabloid.com
NASAKOTE ng mga operatiba ni Criminal Investigation and Detection Group (CIDG) Director P/MGen. Eliseo DC Cruz ang isang 26-anyos lalaking guro, nagpakilalang miyembro ng New People’s Army (NPA) sa pangingikil sa ilang paaralan sa NCR kamakalawa.
Kinilala ang suspek na si Jake Dedumo Castro residente sa Brgy. Zapote, Las Piñas City makaraang malambat sa entrapment operation sa nasabing lugar.
Alinsunod sa programa ni CIDG Director P/MGen. Cruz, pinangunahan ng CIDG-NCR sa pamamagitan ng kanilang flagship program na Project OLEA – Oplan Salikop, ang operasyon laban sa suspek, katuwang ang iba pang Intelligence Unit sa NCR.
Ayon sa ulat ng CIDG, modus ng suspek na magpadala ng mensahe gamit ang gmail account na newpeoplesarmy1969@gmail.com sa ilang private schools at nagpapakilalang miyembro ng NPA-Special Tactical Force, upang mangikil ng halagang P2 milyon sa principal ng paaralan kapalit ang pananakot na aatakehin ang eskwelahan kapag hindi nakiisa at nagbigay ng kanilang hinihinging halaga.
Dahil dito, dumulog sa pulisya ang pamunuan ng hindi pinangalanang private school at agad naglatag ng operasyon na nagresulta sa pagkakasakote sa suspek.
Nasamsam sa suspek ang iba’t ibang gadgets na gamit sa transaksiyon, 12 guage ammunition, caliber revolver at isang motorsiklong Honda XRM, may plakang OY9956.
Nabatid sa CIDG, mahigit 30 private schools sa Taguig, Parañaque, Pasay, Muntunlupa, Makati, Mandaluyong, Pasig, at Quezon city ang nakaranas ng pananakot mula sa modus ng suspek.
Tukoy na ng CIDG ang kasabwat ng suspek at kasalukuyang pinaghahanap ng pulisya.
Samantala, nagpaalala si P/MGen. Cruz sa mga pribadong paaralan sa bansa na patuloy na makiisa at magtiwala sa pulisya. Huwag magpatakot sa sinomang grupo at agad na dumulog sa tanggapan ng CIDG sa oras na makaranas ng kahalintulad na ‘modus.’
“This only proves that our elements on the ground are dedicated to give actions sa anomang ilapit ng ating mga kababayan. Hindi biro na ang isang sibilyan ay makatanggap ng pananakot but please don’t hesitate na dumulog sa ating CIDG Field Units para agad kayong matulungan sa abot ng aming makakaya para masugpo ang anomang modus at makapagbigay ng tamang hustisya,” ani P/MGen. Cruz.
Patuloy sa pagsasagawa ng intelligence operation ang CIDG upang matuldukan ang modus ng grupo. (BRIAN BILASANO)
