HATAW! D'yaryo ng Bayan hatawtabloid.com
PATAY ang isang 2-anyos batang lalaki habang sugatan ang kanyang ina, sa insidente ng hit and run ng isang trailer truck sa Navotas City, kamakalawa ng gabi.
Dead on the spot ang biktimang kinilalang si Markgil Jabuena, Jr., sanhi ng pinsala sa ulo at katawan, habang patuloy na inoobserbahan sa Tondo Medical Center (TMC) ang kanyang inang kinilalang si Shirley Raagas, 32 anyos, residente sa Block 12 Pama Sawata, Brgy. 28, Caloocan City.
Sa salaysay ng saksing si Donalyn Tadeo, 36 anyos, residente sa Block 26 Lot 26 Ph 2, Brgy. NBBS Dagat-dagatan, Navotas City kay P/Cpl .Florencio Nalus, habang binabagtas niya ang C-3 Road patungong Agora Market sakay ng kanyang bisikleta dakong 7:30 pm, nakita niya ang isang trailer truck na mabilis ang takbo.
Pagsapit sa C3 Bridge, Brgy. NBBS Kaunlaran, nasagi at nabangga ng naturang trailer truck ang mga biktima na patawid sa nasabing lugar na nagresulta ng agad na kamatayan ng bata.
Hindi huminto ang driver ng naturang truck at mabilis na tumakas patungong Road 10 sa Manila area habang isinugod ang ina ng bata sa nasabing ospital.
Nagsasagawa ng masusing imbestigasyon ang pulisya para sa posibleng pagkakakilanlan at pagkakaaresto ng suspek. (ROMMEL SALES)
