Pokwang suportado si Chel Diokno

ISA si Pokwang sa nagpahayag ng suporta kay senatorial candidate at human rights lawyer Chel Diokno.

Noong Martes, nag-tweet si Pokwang ng “Dios mio panginoong mahabagin!! mag @ChelDiokno nalang ako!! kaloka sabi nga ni Gary V, dina natuto….”

Tinugunan naman ito ni Diokno ng “Naku po, chel ka lang @pokwang27, Maraming maraming salamat sa suporta.”

Inamin nj Pokwang kay Diokno na isa siyang tagahanga nito, na sinagot naman ng human rights lawyer ng “I’m also a big fan of yours! My son Pepe speaks so highly of you!”, na ang tinutukoy ay ang kanyang anak, ang award-winning director na si Pepe Diokno.

“Waaaahhh I love him napakabuting tao. Maganda pagpapalaki nyo sa kanya @PepeDiokno,” sambit ni Pokwang.

Kamakailan, nakuha ni Diokno ang suporta ng ilang artista, kabilang sina TV host Vice Ganda at aktres na si Heart Evangelista.

Samantala, nakisalamuha si Diokno sa iba pang artista at singer na sumusuporta sa kanya sa campaign kickoff sa Naga City, kabilang ang Rivermaya at sina Nikki Valdez, Cherry Pie Picache, Bituin Escalante, Agot Isidro, atThe Company.

Isusulong ni Diokno ang paglalagay ng libreng tulong legal sa mga baryo, gaya ng Free Legal Helpdesk na kanyang inilagay sa kanyang Facebook page, para mabigyan ng agarang tulong legal ang mga ordinaryong mamamayan kapag nanalo siya bilang senador.

Paiigtingin din ni Diokno ang barangay justice system ng bansa sa pamamagitan ng pagpapalakas sa kapabilidad ng Lupong Tagapamayapa sa pagtugon sa mga isyung legal.

Makatutulong ang pagpapalakas ng barangay justice system para mabawasan ang kaso sa mga hukuman dahil mareresolba na ito sa barangay pa lang. (MVN)