Monica maganda pa rin kahit may mga apo na

HATAWAN
ni Ed de Leon

NOONG isang gabi ay nagulat pa kami nang may makita kaming friend request ni Monica Herrera. Isa iyan sa pinaka-magandang aktres noong 90’s. Nagtagal ang aming chat pagkatapos, at naikuwento niya sa amin na  na-stroke pala siya at ngayon ay partially paralyzed. Bed ridden na siya.

Gayunman, hindi siya nawawalan ng pag-asa. Patuloy siyang nagpapagamot, at tumatawag sa Diyos at buo ang pag-asa na isang araw ay magiging normal na muli ang kanyang buhay.

Nakita namin ang pictures ni Monica ngayon, maganda pa rin naman siya. At nagbibiro ngang sinabi niyang siguro maganda pa rin siya dahil happy siya sa kanyang buhay kapiling ng kanyang mga apo.

Nagulat kami, may mga apo na pala si Monica. Tiyak maaga ring nagsipag-asawa ang kanyang mga anak. Eh bata pa naman iyang si Monica eh.

Nagtagal nga ang aming kuwentuhan, at hanga kami sa kanyang pag-asa at pananampalataya sa Diyos.