HATAW! D'yaryo ng Bayan hatawtabloid.com
PARA sa kabayarang P150,000 para sa apat na hired killers, pinagbabaril ang isang kilalang siruhano at urologist sa lungsod ng Cagayan de Oro, lalawigan ng Misamis Oriental.
Ikinumpisal ito ng mga suspek na nadakip noong Biyernes, 3 Disyembre, ang nakatakdang araw ng pagkolekta nila ng ipinangakong salapi, at 17 oras matapos nilang isakatuparan ang krimen.
Nabatid na mag-isa sa kanyang sasakyan ang biktimang kinilalang si Dr. Raul Winston Andutan, 62 anyos, medical director ng Maria Reyna-Xavier University Hospital (MRXUH), nang pagbabarilin sa Brgy. Nazareth, sa naturang lungsod, pasado 10:00 am, noong Huwebes, 2 Disyembre.
Bagaman sugatan, nagawang magmaneho ng biktima upang makalayo sa mga suspek ngunit bumangga siya kalaunan sa isang laundry shop kung saan isang tao ang nasugatan.
Dinala si Andutan sa MRXUH sa kalapit na Brgy. Camaman-an kung saan siya tuluyang binawian ng buhay dahil sa tatlong tama ng bala ng baril sa kanyang katawan, ani P/Lt. Mirasol Capiña, deputy commander ng Nazareth police station.
Si Andutan ay nagtapos sa UP College of Medicine, naging pangulo ng Philippine Urological Association (PUA), at examiner at miyembro ng Philippine Board of Urology na nagbibigay ng akreditasyon sa mga urology training program sa bansa at nagbibigay ng pagkilala sa mga urologist matapos ang specialty training.
“The manner and gravity of this dastardly attack on one of our members marks a worrying escalation of violence. No cause can justify such brutality and senseless killing,” pahayag ng PUA.
Dakong 3:00 am noong Biyernes, nagkasa ng manhunt operation ang mga awtoridad sa Brgy. San Alonzo, sa bayan ng Balingoan, kung saan nadakip ang tatlong suspek na pawang mga residente sa lalawigan ng Bukidnon.
Kinilala ni P/Lt. Teddy Macarayo, acting Balingoan police chief, ang mga suspek na sina Jomar Adlao, 30 anyos, ng bayan ng Maramag; Marjun Cabug, 39 anyos, ng bayan ng Don Carlos; at Joel Arcilla Nacua, 37 anyos, ng lungsod ng Valencia, pawang sa lalawign ng Bukidnon.
Nasamsam ng mga tauhan ng pulisya sa safehouse na pinanatilihan ng mga suspek ang dalawang kargadong kalibre .45 pistol, at isang hand grenade.
Samantala, nakatakas ang pangunahing suspek na si Rene Tortosa, residente sa bayan Balingoan.
Makalipas ang ilang oras, nasakote ang isa pang suspek na kinilalang si Felipe Entira, 63 anyos, sa bayan ng Balingasag.
Sa panayam sa mga suspek ng lokal na estasyon ng radyo, Magnum Radyo, inamin ni Nacua ang pamamaril kay Andutan habang nakaangkas sa motorsiklong minamaneho ni Cabug.
Ayon kay Nacua, nagsilbing ‘look out’ si Tortosa sa labas ng bahay ng biktima saka ibinigay sa kanila ang numero ng plaka ng sasakyang susundan nila ni Cabug.
Matapos maisagawa ang krimen, nagtungo ang dalawa sa inupahang boarding house sa Brgy. Camaman-an saka sila naghiwalay.
Huli umanong umalis si Nacua at sumakay ng bus patungong Balingoan pasado 1:00 pm noong Huwebes.
Narekober ng pulisya noong Biyernes ang motorsiklong ginamit ng dalawa malapit sa nasabing boarding house ng mga suspek.
Ayon kay P/Col. Aaron Mandia, direktor ng CDO city police, kinilala ng kasera at ilang mga kapitbahay na ang mga nadakip na suspek ang umuupa sa nasabing boarding house.
Parehong umamin si Nacua at Cabug sa magkahiwalay na panayam ng Magnum Radyo na si Tortosa, isang dating sundalo, ang kumuha sa kanila para sa trabahong ito.
Pag-aari rin umano ni Tortosa ang bahay na pinuntahan nila sa Balingoan, ginamit na motorsiklo, mga baril at granadang nakompiska ng mga awtoridad mula sa kanila.
Ani Nacua at Cabug, hindi nila kilala ang mastermind at sinabi lang ni Tortoso na may namatay na pasyente sa kamay ng biktimang doktor.
Nakatakda rin umanong ibigay sa mga suspek ang kabayarang P150,000 noong Biyernes na hahatiin sa apat na katao.
Sa interogasyon sa mga suspek, lumalabas na si Tortosa ang kausap ng mastermind habang ang apat na suspek ang nagsagawa ng pamamaslang na binigyan ng P3,500 bilang operating expenses.
“We hereby condemn in the harshest terms this act of barbarism perpetrated on peaceful, law abiding citizens of our great city. One man’s shortcomings, whether real or imagined, is never reason enough to kill somebody, anybody,” pahayag sa social media ni Cagayan de Oro City Councilor Malou Gaane, isa rin doktor.
Mariing kinondena ng Council for Health and Development ang pamamaslang kay Andutan na kilala ng kanyang mga kasamahan at mga pasyente bilang magaling na siruhano at doktor.
