Retiradong pulis todas sa boga

PATAY ang isang retiradong pulis makaraang barilin sa ulo ng dalawang hindi kilalang salarin habang naglalakad kasama ang kanyang aso sa Quezon City, nitong Miyerkoles ng umaga.

Ang biktima ay kinilalang si Robert Tortogo, 66, may asawa, retired PNP member, at residente sa Sto. Niño Interior St., Brgy. Payatas A, Quezon City.

Sa report ng Criminal Investigation and Detection Unit ng Quezon City Police District (CIDU-QCPD), dakong 6:05 am, 24 Nobyemnre, nang maganap ang pamamaril di-kalayuan sa tahanan ng biktima sa Sto. Niño Interior St., Brgy. Payatas A, sa lungsod.

Sa imbestigasyon ni P/SSgt. Bienvenido DG Ribaya III ng CIDU, naglalakad ang biktima kasama ang kanyang aso nang lapitan siya ng dalawang  lalaki saka binaril sa ulo.

Tumakas ang mga suspek sakay ng isang taxi na humarurot sa hindi natukoy na direksiyon.

Masusing nagsasagawa ng imbestigasyon ang pulisya upang malaman ang motibo ng pamamaslang at makilala ang mga suspek. (ALMAR DANGUILAN)