Rustom poging-poging matinee idol (‘di kinakitaan na magiging Bb Gandanghari)

HATAWAN
ni Ed de Leon

NAGISING kami nang madaling araw na ang natiyempuhan namin sa telebisyon ay simula ng pelikulang Maruja, na batay sa nobela ni Uncle Mars Ravelo. Napapailing na lang kami habang nanonood.

Iisipin mo bang si Rustom Padilla, iyong poging matinee idol at dramatic actor noon ay si BB Gandanghari na ngayon? Noon siguro kapag sinabi mong bading si Rustom, may sasapak sa iyo.

Hindi ba dahil sa ganyang tuksuhan nagsimula noon ang giyera ng mga Padilla at mga Yllana? Noon luma­bas iyong kontrobersiyal na H World.

Naalala nga namin ang kuwento, si Rustom ang naki­usap noon sa Viva na kunin para sa Maruja si  Carmina Villa­roel, para ma­gawa nga ng girlfriend niya noon ang inaasam na role, kahit na si Carmina ay nasa Regal. Ang daming artistang babae ng Viva na naghahangad na gawin ang Maruja, pero matindi ang pakiusap ni Rustom.

Tapos nagkahiwalay din naman pala sila at si Rustom nga ay naging si BB Gandanghari. Hindi masasabing naging ganoon si Rustom dahil sa paghihiwalay nila ni Carmina. Lumalabas na natuluyan ang hiwalayan dahil naging si BB na nga siya at nagkaroon na pala ng kaugnayan kay “Papa Jonathan.” Hindi ba naman misis?