e-Sabong pumalit sa POGO — Pagcor (Sa pagbabayad ng buwis)

AMINADO ang Philippine Amusement and Gaming Corporation (PAGCOR), tinalo ng e-Sabong ang operasyon ng POGO sa pagbabayad ng buwis.

Ayon kay Pagcor Chair Andrea Domingo, maraming online casino o POGO ang nagsara ngayong pandemic.

Nag-alala raw ang naturang ahensiya kung saan kukuha ng revenue na kailangang-kailangan ng bansa bilang pantustos sa pangangailangan ng pamahalaan para labanan ang CoVid-19.

“But when e-Sabong started in May this year, we already made around P3.5 billion in revenues,” ayon kay Chairperson Domingo.

Aniya, “P350 million to P400 million kada buwan ang kinikita ng Pagcor sa online sabong.”

Sa kasalukuyan may apat na kompanyang nag-o-operate ng e-Sabong sa bansa.

Plano ni Domingo na gawing 12 ang online sabong operators para mas malaki pa raw ang kikitain ng ahensiya.

Napag-alaman, unang nag-apply at naaprobahan ng permit to operate ng Pagcor ang Lucky 8 Star Quest Inc., na nagpapatakbo ngayon ng Pitmaster Live na pag-aari ni Charlie “Atong” Ang.