Taxi nabagsakan ng Pine tree (1 patay, 2 sugatan sa Baguio)

BINAWIAN ng buhay ang isang call center agent, habang sugatan ang dalawa niyang kaanak, nang mabagsakan ng Pine tree ang sinasakyan nilang taxi sa Camp 8, Kennon Road, sa lungsod ng Baguio, nitong Biyernes, 23 Hulyo.

Kinilala ni Baguio City Police Office director P/Col. Glen Lonogan, ang namatay na biktimang si Esmerelda Suriaga, 39 anyos; at sugatan niyang mga kaanak na sina Samuel Suriaga, 29 anyos, at Wilfredo Suriaga, 63 anyos.

Idineklarang dead on arrival si Esmerelda sa Baguio General Hospital and Medical Center, samantala nagpa­pagaling pa si Samuel sa paga­mutan, habang nakalabas na si Wilfredo.

Ani Lonogan, hindi nasugatan ang taxi driver na kinilalang si Mizon Arucan Galano, 33 anyos.

Ayon sa pulisya, sakay ang mga biktima ng taksing Mitsubishi Adventure, may trade name na Ar-Anne at plakang AYU-713 patungong city proper mula sa Camp 7 dakong 3:15 pm noong Biyernes nang mabagsakan ng puno.

Nakaupo si Samuel sa tabi ng driver habang magkasama sa likod sina Wilfredo at Esmeral­da. (KLGO)