HATAW! D'yaryo ng Bayan hatawtabloid.com
COOL JOE!
ni Joe Barrameda
KAKAIBA at mas palabang Bianca Umali ang mapapanood sa much-awaited family drama series ng GMA Network na Legal Wives. Bibigyang-buhay ni Bianca sa serye ang karakter ni Farrah, ang pangatlo at pinakabatang asawa ni Ismael—ang role ni Kapuso Drama King Dennis Trillo.
Pagkukuwento ni Bianca, nakare-relate siya sa ipinakitang katatagan ng kanyang karakter sa kabila ng karahasan na pinagdaanan nito. ”Nakare-relate ako sa strength niya—sa strength niya to face the challenges na ibinigay sa kanya. Kasi kahit na wala siyang alam, kahit na hindi niya ini-expect ‘yung mga mangyayari sa kanya, hinarap niya pa rin ‘yun ng buong puso at hindi siya nawala sa sarili niya.”
Isang simpleng college student si Farrah na nag-aaral sa Maynila na magiging biktima ng karahasan ng isa sa kanyang mga kaklase. Ito ang magtutulak sa kanyang amang si Abdul Malik (Bernand Palanca) na ipakasal siya sa matalik na kaibigang si Ismael.
Bukod kay Bianca, gaganap din na mga asawa ni Dennis sa serye sina Alice Dixson at Andrea Torres. Mapapanood na ang natatanging kuwento ng Legal Wives sa world premiere nito sa July 26 sa GMA Telebabad.
