Bianca Umali 13 oras pumila makapagparehistro lang
I-FLEX
ni Jun Nardo
NAGDUSA at nagtiis ng 13 oras si Bianca Umali para pumila kasama ang pinsan sa isang shopping mall kamakailan para makapag-parehistro sa darating na eleksiyon.
Alas tres ng madaling-araw ay nakapila na raw siya hanggang 4:00 p.m. ayon sa post ni Bianca sa kanyang Instagram.
“Sa wakas isa na po akong REHISTRADONG BOTANTE, ang sarap sa puso,” bahagi ng caption ni Bianca sa IG.
Hinikayat din ng isa sa Legal Wives star na magparehistro at bumoto.
“Ito ay ating karapatan at kailangang gampanan. Tungkulin at pananagutan natin ito bilang mga Filipino,” saad pa ni Bianca.
Ipinagmalaki ni Bianca ang hinlalaki niyang may thumbmark.
Siyempre pa, super-like naman sa post ng Kapuso actress ang rumored boyfriend niyang si Ruru Madrid sa ginawa niya, huh!
