HATAW! D'yaryo ng Bayan hatawtabloid.com
NAGSAGAWA ng Oplan Sita ang mga frontliner ng City Public Order and Safety Coordinating Ofice (CPOSCO) ng lungsod ng San Fernando sa pamumuno ni Deputy Chief for Operation Elmer Salangsang, at umayuda bilang katuwang ng pulisya sa pagpapatupad ng safety health protocols laban sa CoVid-19 at iba pang mga ordinansa, nitong nakaraang buong linggo sa harapan ng Camp Olivas, ng nasabing lungsod, lalawigan ng Pampanga.
Tiniketan ang mga driver na walang lisensiya, mga motorsiklong paso ang mga rehistro, saka tinipon ang mga nasitang mga sibilyan sa hindi maayos na pagsusuot ng kanilang facemask at pinagsabihan upang maliwanagan sa kahalagahan ng mga personal protective equipment tulad ng facemask at face shield habang nasa labas ng bahay para maprotektahan ang sarili at makatulong sa pagbaba ng mga kaso ng CoVid-19 sa lalawigan.
Matatandaang dalawang beses nang pinalawig ang Executive Order No. 5 na nilagdaan ni Governor Dennis “Delta” Pineda, mula noong Marso at pangatlo ngayong mula 30 April hanggang 15 Mayo base sa rekomendasyon ng mga alkalde ng iba’t ibang mga bayan at mga lungsod sanhi ng paglobo ng kaso ng CoVid-19 sa Pampanga. (RAUL SUSCANO)
