HATAW! D'yaryo ng Bayan hatawtabloid.com
UMINIT ang ulo kasabay ng panahon, isang barangay tanod ang sinaksak ang kaalitan sa kahabaan ng trapiko ng mga sasakyan sa Bgy. San Patricio, sa bayan ng Mexico, lalawigan ng Pampanga, nitong Martes, 27 Abril.
Kinilala ni P/BGen. Valeriano De Leon ang suspek, ayon sa ulat ni P/Col. Arnold Thomas Ibay, na si Russel Pante, 47 anyos, may asawa, tanod ng Brgy. San Patricio, sa nabanggit na bayan.
Samantala, kinilala ang biktimang si Eliazar Guiao, 40 anyos, may asawa, magsasaka, residente rin sa nabanggit na lugar.
Sa imbestigasyon ng Mexico Municipal Police Station, bandang 6:00 pm nang maganap ang insidente sa Sitio Minangun, sakop ng nasabing barangay habang kasagsagan ang bigat ng trapiko sanhi ng mahabang pila ng mga dumaraang sasakyan.
Nagkaroon umano ng hindi pagkaunawaan ang suspek at ang biktima na nauwi sa matinding pagtatalo na nagresulta sa pananaksak ng una sa huli.
Mabilis na itinakbo sa pinakamalapit na pagamutan ang biktima upang malapatan ng agarang lunas na ngayon ay nagpapagaling na sa mga pinsala sa katawan.
Dinakma at pinosasan ng mga Bantay Bayan ng kanilang barangay ang suspek at isinuko sa Mexico MPS.
Nahaharap sa kasong frustrated murder ang suspek na kasalukuyang nakapiit sa custodial facility ng himpilan ng pulisya.
“This is a clear manifestation of strong police-community partnership where we can count on our citizens in helping address crimes. We continue to solicit their support and be our ears and eyes in the communities,” pahayag ni P/BGen. De Leon. (RAUL SUSCANO)
