HATAW! D'yaryo ng Bayan hatawtabloid.com
ni ROSE NOVENARIO
LEGAL ang utos ni Pangulong Rodrigo Duterte sa mga pulis at militar na patayin ang mga rebeldeng komunista.
“So under IHL (International Humanitarian Law) po, tama iyong order ng Presidente – kill, kill, kill kasi nga po kapag mayroong labanan, kapag ang labanan mo may baril na puwede kang patayin, alangan naman ikaw ang mag-antay na ikaw ang mabaril at mapatay,” sabi ni dating humang rights lawyer at Presidential Spokesman Harry Roque sa virtual Palace press briefing kahapon.
Paliwanag niya, may digmaang nagaganap sa puwersa ng New People’s Army (NPA) at gobyerno kaya batay sa IHL, kailangan parehong armado ang nagpalitan ng putok at hindi puwedeng barilin o patayin ang hindi armadong aktibista.
“Mayroon bang distinction between doon sa mga aktibista at mga rebelde. Siyempre po mayroon, isa po iyan sa cardinal principle ng IHL. One of the basic limitations po ng means and method is always distinguished – kinakailangan ta-target-in mo lang iyong mga kabahagi sa labanan at huwag mong ta-target-in iyong mga hindi kabahagi gaya ng sibilyan,” paliwanag ni Roque.
Noong linggo ay naglunsad ng magkakasunod na police operations sa Calabarzon na nagresulta sa pagpatay sa siyam na aktibista, pagdakip sa anim, at pagkawala ng siyam.
Naganap ang madugong raid dalawang araw matapos utusan ni Pangulong Duterte ang pulis at militar na balewalain ang human rights sa pagtugis sa mga rebeldeng komunista.
Tiniyak ni Roque, iimbestigahan ng gobyerno ang pagpatay sa siyam na aktibista, lilitisin at parurusahan ang mga pumaslang sa kanila.
“Kaya ang sagot ko po roon sa mga napatay na mga aktibista, ang obligasyon ng estado po iimbestigahan at kung makita nila na mayroon talagang dapat parusahan, ang obligasyon ay lilitisin at paparusahan ang mga pumatay,” ani Roque.
“So, iyong siyam po na napatay, iimbestigahan po natin iyan kasi hindi po sila sakop ng International Humanitarian Law dahil noong sila ay napatay, wala naman silang hawak na baril,” dagdag niya.
Kabilang sa mga napatay sa police operations ay si Emmanuel “Manny” Asuncion, secretary general ng BAYAN sa Cavite, kilalang mass organizer sa Southern Tagalog.
Kinilala ng Labor rights group PAMANTIK-KMU ang mag-asawang Chai Lemita Evangelista at Ariel Evangelista na napaslang sa Nasugbu, Batangas, mga miyembtro ng Ugnayan ng Mamamayan Laban sa Pagwawasak ng Kalikasan at Kalupaan (UMALPAS KA).
Nabatid sa mga kaanak ng mag-asawang Evangelista, pinahirapan muna umano sila ng mga pulis bago pinatay.
Nakatakas sa mga pulis ang 10-anyos anak ng mag-asawa nang magtago sa ilalim ng papag.
Nang umalis umano ang mga pulis ay binitbit ang bangkay ng mag-asawa at natagpuan ang mga labi sa punerarya.
Ang search warrant umano ay ipinakita na lamang ng mga pulis sa pamilya ng mag-asawa, ilang oras matapos ang madugong insidente.
Binatikos ni Bagong Alyansang Makabayan (Bayan) secretary-general Renato Reyes Jr. ang pahayag ni Roque.
“Walang sinabi sa IHL na “kill, kill, kill.” Sa katunayan, may mga ipinagbabawal ang IHL na pagpatay, tulad ng pagpatay sa mga hindi na makalaban at sa mga sibilyan o mga ‘di armado. Abogado pa naman, pero binibigyang katwiran ang paglabag sa karapatang pantao,” sabi ni Reyes sa kanyang Facebook post.
