HATAW! D'yaryo ng Bayan hatawtabloid.com
WALA nang buhay nang matagpuan ang katawan ng 30-anyos empleyado ng Department of Social Welfare and Development (DSWD), na nakasilid sa isang sakong inabandona sa isang talahiban sa lungsod ng San Jose del Monte, lalawigan ng Bulacan, noong Linggo, 21 Pebrero.
Kinilala n P/Col. Julius Alvaro, hepe ng SJDM city police, ang labi ng biktimang si Justine Charles Accad III, tubong Zamboanga at residente sa lungsod ng Marikina.
Ayon sa mga imbestigador, nakabalot ng packaging tape ang ulo ng biktima habang itinali ang kanyang mga kamay sa kanyang mga paa gamit ang kable.
Natuklasan ng isang basurero ang katawan ng biktima dakong 3:00 pm noong Linggo sa Brgy. Kaypian.
Anang pulisya, hinalughog ng basurero ang sako dahil sa masangsang na amoy na nanggaling mula rito.
Ayon kay Alvaro, nawawala si Accad noong pang Biyernes, 19 Pebrero, at huling nakitang umalis ng kanyang bahay patungo sa kanyang trabaho sa San Juan City Hall sakay ng kanyang kulay abong Honda Civic.
Positibong kinilala ng buntis na kinakasama ng biktimang si Jessa Muncada, at kanyang kapatid na si Jessica Accad, ang labi ng biktima.
