Hilera ng motorsiklo sa Recto inararo ng jeepney 8 sugatan

SUGATAN ang walo katao nang ararohin ng  pampasaherong jeepney ang mga naka­hintong motor­siklo sa Recto Avenue corner Masangkay St., sa Binondo, Maynila nitong Lunes.

Kabilang sa suga­tan ang rider na si Jabilar Candidato, 25 anyos; Brian Figueroa, 42; at kanyang backride na si Jeremy Ablao, 21.

Sa kuha ng CCTV, kita ang pagsalpok ng jeepney, ay plakang PXY 513, minamaneho ni Jofet Esteban Santiago ng Dagupan, Tondo sa mga motorsiklo habang naghihintay na humu­dyat ng go ang traffic light.

Sa lakas ng impact, tumilapon ang isa sa mga rider habang sabay-sabay na nagtumbahan ang mga katabi nito.

Ayon kay Kagawad Joel Sabado ng Brgy. 294, Binondo, mabilis ang takbo ng jeepney driver.

“Nawalan daw po siya ng preno. Lumusot daw po ang preno niya. Pero base sa nakita namin, medyo mabilis ‘yung takbo,” ani Sabado.

Nasa kustodiya na ngayon ng Manila Traffic Bureau si Santia­go habang patuloy ang imbes­tigasyon sa insidente.