HATAW! D'yaryo ng Bayan hatawtabloid.com
KINOMPIRMA ni vaccine czar Carlito Galvez, Jr., na lumagda sa indemnification agreement ang Filipinas sa pharmaceutical companies na Pfizer at AstraZeneca.
Ito’y bahagi ng requirement para mai-deliver sa bansa ang mga bakuna kontra CoVid-19 mula sa COVAX global facility.
“Para sa pinakabagong balita tungkol sa COVAX facility, ang una po nakapirma na po at naisumite na po natin ang mga requirement kasama po rito ang indemnification agreements para sa Pfizer at AstraZeneca, so napirmahan na po namin iyon,” ani Roque sa Laging Handa public briefing kahapon.
“Ikalawa, ikinakatuwa natin na nabigyan ng WHO ng Emergency Use Listing o EUL ang AstraZeneca, napakagandang balita po iyan. Iyong AstraZeneca po kasama po iyong ginagawa po ng Covishield sa SII at ang isa po rito ginagawa sa South Korea. Sa pamamagitan nito ay puwede na pong makapagpadala ng bakuna rito sa ating bansa ang AstraZeneca through COVAX facility.”
Ginawaran aniya ng Food and Drug Administration (FDA) ng emergency use authorization (EUA) para sa Pfizer sa ilalim ng COVAX donation habang ang para sa AstraZEneca ay ‘ongoing’ ang pag-aproba .
Tiniyak ni Galvez, handang-handa ang Filipinas para sa pagdating ng 117,000 doses ng Pfizer CoVid-19 vaccine.
Kaugnay nito, kinompirma ni Dr. Mary Antonette Remonte, Acting Senior Manager ng PhilHealth Benefits Development and Research Department, na kasado na ang compensation package para sa makararanas ng side effects o severe reactions sa CoVid-19 vaccine.
“Ang pinag-uusapan na lang po ay ‘yung kung ano ‘yung final amount doon sa mga kailangang alagaan sa ospital ‘pag nagkaroon ng reactions sa vaccine,” ani Remonte sa panayam sa CNN Philippines.
Ayon kay Sen. Ralph Recto, may reserve fund na P116 bilyon at P5.3 bilyon net income noong 2020 ang PhIlHealth kaya’t hindi kailangan bigyan ng dagdag na P500 milyon ang ahensiya para magsilbing indemnification fund.
(ROSE NOVENARIO)
