PNP naglunsad ng CARE BHW Infodemic, inilarga vs CoVid-19 (Sa Pampanga)

SINUYOD ng mga kagawad ng pulisya ang kanilang mga kinaka­sakupang barangay upang bigyan ng tamang kaalaman ang health workers (BHW) hinggil sa Coronavirus Awareness Response and Empowerment (CARE) infodemic upang maiwasan ang pagkalat ng CoVid-19 sa lalawigan ng Pampanga.

Nagsagawa ng pana­yam ang mga kagawad ng Mexico PNP sa pangunguna ni P/Lt. Marlon Imperial at pamumuno ni P/Lt. Col. Angel Bondoc sa mga barangay ng Parian at San Vicente dakong 9:00 am nitong Martes, 19 Enero.

Sumabay rin ang Guagua municipal police station sa pamumuno ni P/Lt. Col. Julius Javier na sinadya ang Brgy. San Rafael samantala nagtu­ngo sa Sto. Tomas ang Sasmuan PNP sa pangu­nguna nina P/SSgt. Michelle Parian at Pat. Jeric Maron, sa pamu­muno ni P/Maj. Jimmy Malonzo.

Sama-samang tinipon ang barangay council, Barangay Peace Keeping Action Team (BPATs), Force Multipliers at miyembro ng mga Kabataang Kontra Droga at Terorismo (KKDAT) bilang kalahok sa nasabing aktibidad.

Kamakailan ay isina­ilalim sa CARE Infodemic seminar ang mga pulis sa Central Luzon upang mabigyan ng wastong imporma­syon sa CoVid-19 at maipalaganap sa kani­lang area of responsibility (AOR).

Namigay rin ang pulisya ng facemasks, face shield, alkohol at mga pagkain sa mga dumalo sa pagpu­pulong.

(RAUL SUSCANO)