4 kelot tiklo sa tupada

ARESTADO ng mga awtoridad ang apat na lalaki kabilang ang isang senior citizen at security officer sa pagtutupada sa Taguig City, nitong Sabado.

Kinilala ang mga suspek na sina Archie Gonzales, 32, may asawa, security guard, ng Block 42, Lot 11, Barangay Pinagsama, Taguig City; Benjamin Reyes, Jr., 47, may kinakasama, Block 3, Lot 8, SSB, Barangay Western Bicutan; Tiago Modesio, 65, biyudo, Block 3, Lot 8, SSB, Barangay Western Bicutan; at Ramon Relos, Jr., 34, may asawa, Security Officer, ng Bldg. 4, 210 Centennial Village, Barangay Western Bicutan sa nasabing lungsod.

Sa ulat ni P/SSgt. Ronald Alonzo, may hawak ng kaso, nagkasa ng anti-illegal gambling operation ang mga tauhan ng Sub-Station 2 sa superbisyon ni Major Jonathan Mangohan sa Centennial Village, Barangay Western Bicutan sa Taguig City, na ikinaaresto ng mga supek dakong 11:45 am.

Nag-ugat ang operasyon nang makatanggap ang awtoridad mula sa isang concerned citizen kaugnay ng nagaganap na illegal cockfighting o tupada sa lugar. Nakompiska sa mga suspek ang dalawang panabong na manok, dalawang tari, at P2,100 pusta sa sabong.

Sasampahan ang apat na suspek ng kasong paglabag sa PD 1602 (Illegal Cockfighting/Tupada) sa Taguig Prosecutor’s Office. (JAJA GARCIA)