HATAW! D'yaryo ng Bayan hatawtabloid.com
ANG pinag-uusapan na naman nila ngayon, bukod doon sa bakasyon sa private resort ni Gerald Anderson, kasama rin ng actor ang sinasabing syota na niyang si Julia Barretto na nag-mountain climbing sa Mt.Kulis sa Tanay, Rizal. Kumalat naman iyan dahil sa social media post na ginawa ni Julia mismo at ng kapatid ni Gerald. Napagkompara ng mga tao ang mga tanawin, at nalaman nila na iisang lugar nga iyon. Mayroon pang drone shot na nakita ang dalawang taong magka-akbay, at nag-match sa mga damit na suot nina Julia at Gerald batay sa ibang mga posts.
Nag-post din si Julia ng isang picture niya sa social media at ang napansin ng mga tao ay ang suot niyang kuwintas na ang palawit ay letter “G.”
Hindi rin namin alam kung ano ang gimmick at patuloy ang kanilang denial na magsyota nga silang dalawa, pero panay naman ang posts nila sa social media ng mga picture na nagbubuko sa tunay nilang relasyon, bukod pa nga sa nasabi ni Dennis Padilla noon na inamin ni Gerald sa kanya na nanliligaw iyon kay Julia. Talaga bang matindi pa rin ang takot nila na masabing totoong may nangyaring “ghosting”? Eh nangyari na iyon eh, bakit nga ba hindi pa nila panindigan?
Ang nakatatakot diyan, baka in the end, ang lumabas pa ay niloloko nila ang publiko dahil sa patuloy nilang denial sa kanilang relasyon. Baka sa halip na kiligin sa relasyon nila ang fans, mainis pa dahil matagal na rin naman silang nabobola.
Hindi na pinag-uusapan ngayon iyong ghosting eh. At saka alam naman ninyo sa showbusiness, nangyari na iyan eh, aminin na lang nila para makalimutan na. Habang hindi nila inaamin iyan mauungkat pa iyan nang mauungkat, at hindi maganda iyon para sa kanila.
HATAWAN
ni Ed de Leon
