HATAW! D'yaryo ng Bayan hatawtabloid.com
NABARIL at napatay ang isang lalaking ‘nangumpisal’ na isa siyang drug user habang sugatan ang kanyang kasamang babae nang tambangan sa isang abalang kalsada sa lungsod ng Bais, lalawigan ng Negros Oriental, noong Linggo, 6 Disyembre.
Minamaneho ng biktimang kinilalang si Patrick Manuel Romero, 31 anyos, angkas ang kaniyang live-in partner na si Rhea Lou Pagador, 29 anyos, nang harangin ng mga hindi kilalang suspek.
Nabatid na ilang ulit binaril ng nakaangkas na suspek si Romero.
Agad dinala si Romero at kasama niya sa Bais City District hospital ngunit binawian ng buhay ang biktima, samantala, nakaligtas si Pagador na tinamaan ng bala ng baril sa siko.
Nakuha ng forensics examiners sa pinangyarihan ng insidente ang isang hindi pa naipuputok na bala ng baril, pitong naiputok nang bala ng kalibre .45 baril, depormadong basyo ng bala, at isang cellphone.
Ayon kay P/CMSgt. Edelberto Euroba III, public information officer ng Negros Oriental police, patuloy na nag-iimbestiga ang pulisya ng Bais kaugnay sa pamamaslang.
