Parak itinumba sa Toledo, Cebu

BUMAGSAK nang walang buhay ang isang pulis matapos pagbabarilin ng hindi kilalang mga suspek sa Barangay Dumlog, lungsod ng Toledo, lalawigan ng Cebu, pasado 9:00 am kahapon, 3 Disyembre.

Kinilala ang biktimang si P/SSgt. Gerfil Geolina, 44 anyos, nakatalaga sa bayan ng Asturias, sa nabanggit na lalawigan.

Nabatid na nagmamaneho ng kaniyang motorsiklo nang tambangan at pagbabarilin ng dalawang lalaking magkaangkas rin sa motorsiklo.

Tinamaan si Geolina ng bala ng baril sa iba’t ibang bahagi ng katawan na naging sanhi ng kaniyang agarang kamatayan.

Ayon kay P/Lt. Col. Junnel Caadlawon, hepe ng Toledo city police, nakarinig umano ng sunod-sunod na putok ng baril ang mga residenteng nakatira malapit sa pinangyarihan ng krimen.

Nang lumabas sila ng kanilang mga bahay, nakita nila ang biktimang nakahandusay na sa lupa.

Dagdag ni Caadlawon, sinabi ng mga nakasaksi sa mga imbestigador na nakasuot ng full-faced helmet ang mga suspek.

Patuloy na tinutukoy ng mga awtoridad ang pagkakakilanlan ng mga suspek at ang motibo sa likod ng pamamaslang.