Sundalo patay, 3 pa sugatan (Pick-up nahulog sa creek)

 BINAWIAN ng buhay ang isang sundalo habang sugatan ang tatlong iba pa pang pasahero ng kanilang pick-up nang mahulog sa tulay at dumeretso sa creek sa Old Aiport, Sasa, sa lungsod ng Davao, nitong  Martes ng madaling araw, 1 Disyembre.

Isinugod ang mga biktima sa Southern Philippines Medical Center ngunit idineklarang dead-on-arrival ang pasaherong kinilalang si Michael Almaida, 34 anyos, miyembro ng Philippine Navy, at residente ng Imus, Cavite.

Samantala, sugatan at nagpapagaling sa ospital ang driver ng pick-up na si Sgt. Crisanto Gacang, at mga pasaherong sina Michael Balos, at Sgt. Joel Custodio.

Sa imbestigasyon ng Sasa Police, binabaybay ng sasakyan ang innermost lane ng Davao-Agusan National Highway galing sa norte at patungong lungsod ng Davao ngunit pagdating malapit sa Old Davao Airport, biglang nagpreno ang sasakyan para iwasan ang nabanggang sasakyan sa unahan nito.

Nawalan ng kontrol ang driver dahil sa madulas na kalsada, dahilan ng pagkahulog sa creek.