HATAW! D'yaryo ng Bayan hatawtabloid.com
NOONG September 14, Lunes, sumagot si Ogie Diaz kay BB Gandanghari sa panlalait nito sa kanilang hitsura nina Lolit Solis at Cristy Fermin at sa umano’y may utang pa siya kay Rustom Padilla, ang dating katauhan ni BB.
Ito’y matapos silang magbigay ng reaksiyon sa ginawang rebelasyon ni BB na may nangyari sa kanila ni Piolo Pascual noong nasa America sila.
Sa ipinost na video ni Ogie, sabi niya, “Eh, ‘di, ikaw na ang pinakamaganda sa amin. Kumbaga, kung apat tayong magkakapatid, kunwari ikaw ampon, ‘di ba? Ibigay natin kay BB Gandanghari na siya ang pinakamaganda. Maganda ka BB, ikaw pinakamaganda sa amin. Noong bumabae ka, napakaganda mo.”
Tungkol naman sa sinasabing utang niya kay Rustom, ang sabi ni Ogie, “’Yung utang, utang na loob, wala akong utang na kay Rustom Padilla. Hindi ko kailangang i-dignify iyan. Kahit sinong ituro mo sa akin, sinong pinagkakautangan ko, sabihin mo sa akin.Kung pera man ‘yang tinutukoy mo, BB, wala akong matandaan na may utang ako kay Rustom, noong dating Rustom ka pa. Una, mas galante si Robin Padilla kaysa kay Rustom Padilla (nakababatang kapatid ni BB). Pangalawa, mabait sa akin si Rustom Padilla, pero hindi kami ganoon ka-close.”
Sa pagkakaalam din ni Ogie, wala siyang atraso kay Rustom.
“Kung ang sinasabi mo utang kay Rustom ay kung may kasalanan ako kay Rustom, may atraso ako sa kanya, may nasabi akong ‘di maganda sa kanya, tell me, kung ano ‘yung mga ebidensiya mo, ‘di ba? Kung may mga ebidensiya ka, tell me, ‘di ba? Kaya naman, alam mo, Rustom, the burden of proof is always on the accuser, ‘di ba? Accuser ka, nasa iyo ang burden of proof. Ngayon, maglabas ka ng pruweba na ako nga ay may utang, kasalanan, atraso kay Rustom, noong Rustom Padilla ka pa.
“Kung mayroon man at maaalala ko na, ‘Oo nga, may kasalanan ako kay Rustom,’ naku, kahit magbagong anyo ka, kay Rustom ako magso-sorry. Hindi sa iyo. Kasi binago mo ang hitsura ni Rustom.”
Sa huling bahagi ng kanyang video, nagpaliwanag si Ogie kung bakit sumagot pa siya kay BB.
“Siguro ‘yung iba, nanibago, ‘Sana hindi na pinatulan ni Ogie.’ Hindi po, eh. ‘Pag ako pinaratangan ako na may utang ako, roon ako aaklas. Sabihin bang may utang ako kay Rustom. Pera man iyan atraso o kasalanan, patunayan mo nga kung ano nga iyon, detalyado, hindi ‘yung sinabi mo lang. Kung ano nga ‘yon…andami mong… arte-arte mo pa. Huwag nang bumabae.”
MA at PA
ni Rommel Placente
