HATAW! D'yaryo ng Bayan hatawtabloid.com
SA KASALUKUYANG pandemya na kinahaharap ng bansa maging sa buong mundo dahil sa coronavirus o CoVid-19, ang nurses ng bansa maging sa pribadong sektor ay isa sa mga pangunahing depensa ng bansa sa paglaban dito.
Kaya bilang suporta sa nurses na kabilang sa frontliners na kasalukuyang nasa unahan ng peligro at walang pagod na nakikipaglaban, naghain si Deputy Speaker at Davao 1st District Rep. Paolo “Pulong” Duterte ng House Bill No. 7569 o “Minimum Wage for Nurses in the Private Sector Act of 2020.”
“Napakalaki ng kontribusyon ng ating mga nurses sa mga pribadong hospital sa laban na ito sa pandemyang ating kinahaharap. Nararapat lang silang mabigyan ng tamang pagpapahalaga, unang-una na ang tamang sahod at benepisyo,” pahayag ni Rep. Duterte.
Matatandaan kamakailan na itinaas ng pamahalaan ang sahod ng mga nurses sa public sector na ang sahod ng nasa pampublikong ospital ay umaabot mula P19,845 hangang P30,531 kada buwan.
Sa kabila nito, malayo pa rin sa maaaring makuha ng isang nurse kung magtatabraho sa ibang bansa.
“Sa pamamagitan ng panukalang ito, mas mapoprotektahan natin ang ating nurses and matutulungan sa kanilang pinansiyal na pangangailangan. At maikokonsidera nilang manatili na lang sa bansa imbes makipagsapalaran sa ibang bansa at iwanan ang pamilya,” makabuluhang dagdag ng mambabatas.
Sa ilalim ng batas na isinusulong ni Deputy Speaker Duterte, anak ni Presidente Rodrigo Roa Duterte, mangangasiwa ang National Wages Productivity Commission (NWPC) ng Department of Labor and Employment (DOLE) sa pagtataas ng minimum na sahod ng nurses sa pribadong hospital.
Ito ay makikipag-ugnayan sa Department of Health (DoH), Philippine Nursing Association at Private Hospitals Association of the Philippines para sa mga kaukulang pagtataas base sa lugar o kapasidad ng isang pribadong hospital.
“Proteksiyon, aruga, pagmamahal. Ito ang mga dapat nating ipagkaloob sa ating frontliners maging sa mga nurses na nasa pribadong hospital,” pagtatapos ni Duterte.
