HATAW! D'yaryo ng Bayan hatawtabloid.com
PATAY ang isang lalaki nang pagbabarilin ng hindi kilalang suspek, kahapon ng umaga, Linggo, sa Port Area, Maynila.
Sa kuha ng closed-circuit television (CCTV) camera, makikitang nakaupo at tila may hinihintay ang biktima sa Railroad St., Barangay 650, dakong 9:30 am.
Sa ulat, sinabing dalawang lalaki ang lumapit sa nakasandong biktima at ilang minuto ang lumipas ay pinagbabaril ang biktima.
Walang nagsalitang testigo at wala rin umanong nakakikilala sa mga suspek. Hindi umano kilala sa lugar ang biktima.
“Kami, takot na rin e. Kung minsan, gusto ko nang magbitiw kasi kapag ganyan, nangangamba rin kami na baka mamaya balingan kami ng kung sino ang gumagawa ng krimen,” ani Rodolfo Trino, ex-officio ng Barangay 650.
Ipinatawag sa presinto si Trino dahil nakita siya sa CCTV footage na dumaan sa crime scene bago ang insidente.
Tumanggi munang magbigay ng pahayag ang Homicide Section ng Manila Police District habang patuloy ang imbestigasyon sa krimen.
