HATAW! D'yaryo ng Bayan hatawtabloid.com
MISTULANG nagkaroon ng ‘selective amnesia’ kamakalawa ng gabi si Pangulong Rodrigo Duterte nang itatwa ang mga kaalyadong tumulong sa kanya noong 2016 presidential elections dahil sa kasalukuyang isinusulong na revolutionary government.
Sa kanyang public address na iniere kahapon ng umaga, tahasang nilaglag ng Pangulo ang kanyang masusugid na kaalyado matapos pangunahan ang inisyatiba sa pagtatatag ng revolutionary government para maikasa ang charter change (Cha-cha) upang isulong ang federalismo.
Dumistansiya si Pangulong Duterte sa grupong Peoples National Coalition for RevGov and Charter Change at ikinaila na kilala niya ang national deputy spokesperson na si Bobby Brillante maging ang Mayor Rodrigo Roa Duterte – National Executive Coordinating Committee (MRRD-NECC) ni Atty. Francisco “Arlene” Buan.
Noong nakaraang linggo ay nagtipon ang mga miyembro ng mga nasabing mga grupo at isinapubliko ang adbokasiyang magtatag ng revolutionary government na pamumunuan umano ni Pangulong Duterte sa ilalim ng revolutionary constitution hanggang 31 Disyembre 2021 at saka magdaraos ng eleksiyon sa ilalim ng federal form of government alinsunod sa bagong amyendang Konstitusyon.
“Pero alam mo, marami ngayon may naglalabas — revolutionary government. Tapos ako ang sinasabi na… Wala akong pakialam niyan, wala akong kilala na mga tao na ‘yan at hindi ko ‘yan trabaho,” anang Pangulo.
Taliwas ang sinabi ng Pangulo sa dokumentadong pagdalo niya bilang guest of honor ng Mayor Rodrigo Roa Duterte-National Executive Coordinating Committee (MRRD-NECC) National Convention na ginanap sa Cuneta Astrodome, Pasay City noong 21 Marso 2018.
Matutunghayan ang video ng pagtitipon sa https://rtvm.gov.ph/mayor-rodrigo-roa-duterte-national-executive-coordinating-committee-mrrd-necc-national-convention/
Sa press release ng Presidential News Desk (PND) para sa okasyon ay nakasaad na, “The MRRD -NECC is a volunteer organization that helped him win the presidency during the last election.”
“Kalimutan natin ‘yung mga partido-partido. Partnership na lang tayo. Kasi kung mag-ano tayo walang mangyari e… Tulungan na lang tayo,” anang Pangulo sa kanyang talumpati sa MRRD-NECC convention. (ROSE NOVENARIO)
