HATAW! D'yaryo ng Bayan hatawtabloid.com
TALIWAS sa paulit-ulit na panawagan sa publiko ng programang Laging Handa sa People’s Television Network Inc. (PTNI) na sumunod sa health protocols upang maiwasan ang pagkalat ng coronavirus disease (COVID-19), desmayado ang ilang empleyado ng state-run network sa tila pagpapabaya sa kanila kaya’t may 19 kawani ang nagpositibo sa nasabing sakit.
Batay sa source, noong 5 Hulyo, napaulat na nagpositibo sa COVID-19 ang isang reporter kaya ibinalik sa work from home ang ilang kawani na nauna nang inabisohang magsipasok sa tanggapan ng PTV sa Visayas Ave., Quezon City.
Noong 13 Hulyo ay may siyam umanong empleyado ang unang nagpositibo sa COVID-19 at pinapunta sila ng management sa Lung Center of the Philippines ngunit walang isinagawang koordinasyon ang PTNI sa pagamutan kaya’t sa haba ng pilang dinatnan nila ay minabuti na lamang nilang umalis.
Hanggang umabot sa 16 hanggang 19 empleyado mula sa iba’t ibang departamento ng PTNI ang nagpositibo sa rapid test .
“Ang problema, ‘yung mga nag-positive pero walang sintomas ay hindi pinapag-swab test dahil hindi raw required kung walang sintomas,” anang source.
Wala umanong naganap na disinfection sa tanggapan ng PTNI pero pinapapasok pa rin nila ang ibang empleyado.
“Isang linggo ang nagdaan, after ma-announce ‘yung nag-positive na reporter, marami pong pinag-stay-in doon. Isang lingo po ‘yun, walang disinfection. Dalawa po ang nagpositibo sa rapid test sa mga nag-stay-in at may dalawa pang naghahatid-sundo sa employees ,” dagdag ng source.
Nagkaroon umano ng pagtatalo ang dalawang opisyal ng PTNI dahil sa mabagal na pag-aksiyon sa kinakaharap na sitwasyong pagkalusugan ng mga empleyado at ang umano’y inaasikaso ay “relaunch” ng state-run network.
Isang opisyal umano ng state-run network ang nagsabi na hinahanapan ng paraan ng management para hindi ‘mapaso’ sa Commission on Audit (COA).
“Puwede naman siguro na magkaroon ng purchase o expenses dahil public health emergency ang situation ng buong bansa para naman idahilan pa ang COA sa makupad nilang aksiyon,” sabi ng source.
“Puro siya lip service at gasgas na linyang, ‘bukas ang aking linya para sa inyo’ pero kahit may emergency situation, mala- pagong ang aksiyon,” dagdag niya.
Maging ang board of directors ng PTNI ay wala pa umanong nailalabas na resolution kaugnay sa usapin.
Si Katherine de Castro ang general manager ng PTNI habang si Paco Evangelista ang itinalaga niyang overseer ng News Department.
Ang PTNI ay isang government owned and controlled corporation (GOCC) na nasa ilalim ng pangangasiwa ng Presidential Communications and Operations Office (PCOO).
Ang PCOO ang nasa likod ng infomercial kaugnay sa health protocols na dapat sundin ng mga mamamayan sa panahon ng pandemya.
(ROSE NOVENARIO)
