Pulis-Davao todas sa sariling boga

PATAY ang isang pulis matapos aksidenteng pumutok ang nililinis niyang service pistol noong Martes ng hapon, 16 Hunyo, sa labas ng kaniyang bahay sa Barangay Tubod, bayan ng Bansalan, lalawigan ng Davao del Sur.

Kinilala ni P/Maj. Peter Glenn Ipong, hepe ng Bansalan police, ang biktimang si Patrolman Kim Lester Cosido, 27 anyos, nakatalaga sa Digos City police station at bilang security escort ni Mayor Josef Cagas.

Ayon kay Ipong, nililinis ni Cosido ang kaniyang Taurus TS9 baril sa labas ng kaniyang bahay nang aksidente itong pumutok at tumama sa dibdib ng biktima.

Isinugod si Cosido sa Viacrusis Medical Hospital, kung saan siya idineklarang patay nang idating sa ospital.

Nabatid, day-off mula sa kaniyang official na duty ang pulis nang maganap ang insidente.

Narekober ng mga imbestigador ang pumutok na baril, magasin na may 15 pirasong bala ng 9mm, isang firearm case, at mga panlinis ng baril.

Isinialim din si Cosido sa paraffin examination upang matukoy kung siya ang aksidenteng nakaputok ng baril sa sarili.