Relasyon ni Romnick kay Barbara, ‘di itinanggi

HINDI naman nag-deny si Romnick Sarmenta na may girlfriend na nga siya ngayon, pero hinihiling lang niya sa mga tao na sana irespesto naman ang kanyang privacy.

Nagsimula lang naman lahat nang iyan dahil mismo sa mga social media posts ni Romnick din at ng sinasabing syota niya ngayong si Barbara Ruaro. Hindi naman siguro dahil gusto lang niyang itago ang relasyon niya sa indie actress, dahil kung iisipin mo bale dalawang taon na naman silang hiwalay ng dating asawang si Harlene Bautista, at naghihintay na lang ng annulment ng kanilang kasal. Pero siguro nga ayaw din ni Romnick na mapag-usapan ang kanyang pakikipagrelasyon habang hindi pa annulled ang kasal nila ni Harlene, at para wala na ring masabi ang lima nilang naging anak.

Hanggang ngayon, mahirap namang iwasan ni Romnick iyang tsismis, kasi ang tingin sa kanya ng mga tao ay parang matinee idol pa rin, at interesado ang mga fan sa kanyang lovelife. Natural iyon eh, at mahirap mo nang baguhin iyon.

Siguro makatutulong din kung sila mismo ang unang iiwas sa palitan nila ng mga post sa social media. Kasi basta nag-post ka sa social media, binubuksan mo na sa publiko kung ano man ang mga bagay na pribado tungkol sa iyo.

Kung kami naman ang tatanungin, eh ano ba kung may girlfriend na si Romnick, hindi ba natural lang naman iyon dahil matagal na siyang hiwalay sa asawa. Mas pangit naman siguro ang ginagawa niyong iba, hindi nga nagso-syota pero kung kani-kanino naman sumasabit.

Isa pa, dalaga naman si Barbara. Wala namang sabit kaya ano ang masama roon?

Pareho naman silang matured na, at alam na nila kung ano ang kanilang ginagawa.

HATAWAN
ni Ed de Leon