HATAW! D'yaryo ng Bayan hatawtabloid.com
MALUBHANG nasugatan ang isang pintor matapos saksakin ng ka-barangay sa Malabon City, kamakalawa ng gabi.
Inoobserbahan sa Tondo Medical Center (TMC) ang biktimang kinilalang si Richard Duculad, 27 anyos, residente sa Flovie 7, Phase 6, Letre Paradise Village Barangay Tonsuya sanhi ng saksak sa kaliwang bahagi ng kanyang likod.
Naaresto sa follow-up operation ng mga tauhan ng Malabon Police Community Precinct (PCP-8) ang suspek na kinilalang si Samuel Tenedero, 30 anyos, ng Flovie 5 Letre ng nasabing barangay at narekober ang ginamit na kitchen knife.
Sa imbestigasyon nina P/SSgt. Ernie Baroy at Jose Romeo Germinal, dakong 11:30 pm, naglalakad ang biktima sa kahabaan ng Flovie 7 pauwi sa kanila bahay nang walang sabi-sabing sinaksak ng suspek sa katawan.
Matapos ang insidente, mabilis na tumakas ang suspek sa hindi matukoy na direksiyon habang isinugod ng nagrespondeng mga tauhan ng PCP-8 ang biktima sa naturang pagamutan.
Inaalam ng pulisya ang motibo ng suspek sa pananaksak sa biktima.
(ROMMEL SALES)
