HATAW! D'yaryo ng Bayan hatawtabloid.com
BUNSOD ng mababang presyo ng kamatis sa kabila ng mataas na produksiyon, napipilitan ang mga vegetable farmer na itambak na lamang sa gilid ng kalsada ng mga lalawigan ng Ifugao at Nueva Viscaya ang maliliit at katamtamang ang laking kamatis.
Noong 2 Hunyo 2020, natagpuang itinambak sa mga kalsada sa bayan ng Tinoc sa lalawigan ng Ifugao ang tone-toneladang kamatis.
Samantala, noong isang linggo, iniwan din ang malaking ani ng kamatis sa mga kalsada ng bayan ng Bambang, sa lalawigan ng Nueva Vizcaya.
Ayon kay Adrian Albano, administardor ng Ifugao Highland Farmers’ Forum sa isang panayam sa telepono noong 4 Hunyo, dagdag sa pasanin ng mga vegetable farmer simula ang idineklarang quarantine sa buong Luzon dahil sa coronavirus disease (COVID-19).
Aniya, ang dagsa ng suplay ng kamatis ay dahil sa paiba-ibang iskedyul ng pagbibiyahe ng gulay mula sa lalawigan ng Ifugao.
Bumaba ang presyo ng kamatis hanggang P4 at P5 kada kilo, halos kalahati sa presyong P12 kada kilo na kikita ang vegetable farmers.
Nakita sa mga transaksiyon noong 4 Hunyo sa Nueva Vizcaya Agricultural terminal sa bayan ng Bambang, bumaba hanggang P6 at P7 ang kilo ng kalabasa habang ang dilaw na luya ay mabibili sa halagang P15-18 kada kilo.
Sa kabila nito, ibinigay ng mga vegetable farmer ang bahagi ng kanilang mga ani sa mga komunidad na nasa ilalim ng quarantine.
Upang mailigtas ang mga inabandong kamatis, nagpadala ng mga trak ang mga lokal na pamahalaan ng Aritao at Solano sa lalawigan ng Nueva Vizcaya; maging ang pamahalaang bayan ng Kiangan at Lagawe upang kunin ang mga kamatis na hindi naihatid sa mga pamilihan.
Idinagdag ng mga nasabing LGU ang 4,000 kilong kamatis sa 1,500 kilong bell pepper na ipinamahagi nila sa mga mamamayang nananatiling nasa loob ng kanilang mga bahay.
